Béim ar an gCiste Rannpháirtíochta Sonraí Oscailte : Sonraí Oscailte Thailte Móna agus Bheartais na hEorpa

An English version of this item is available here.

Údar: Niall Ó Brolcháin

In ainneoin an rabhaidh aimsire oráiste i nGaillimh Dé Sathairn 6 Aibreán, d’éirigh thar barr le Mapathon Sonraí Oscailte Thailte Móna agus Bheartais na hEorpa 2024 in Ollscoil na Gaillimhe.

Ba é cuspóir na hócáide tailte móna ar fud na hEorpa a mhapáil agus iad a nascadh le beartais trí úsáid a bhaint as sonraí oscailte agus sonraí poiblí eile.

Agus 184 duine cláraithe agus 20 foireann páirteach sa Mapathon, mapáladh na tíortha seo a leanas go léir trí úsáid a bhaint as bogearraí foinse oscailte QGIS: Éire, an Ríocht Aontaithe (An Albain agus Sasana), an Ísiltír, an Ghearmáin, an Fhrainc, an Fhionlainn, an Danmhairg, an tSualainn, an Iorua, an Íoslainn, an Laitvia, an Liotuáin, an Eastóin agus an Pholainn.

Rinne foirne na tailte móna ar fud thuaisceart na hEorpa a shainaithint agus a mhapáil, d’aithin siad agus léirshamhlaigh siad beartais agus rinne siad iad sin a nascadh le léargais ó shonraí oscailte.

D’fheidhmigh líon mór oibrithe deonacha ó Ionad Anailísíochta Sonraí Insight mar fhoireann tacaíochta chun Sonraí Oscailte geospásúla agus i bhfoirm tábla a chomhtháthú trí uirlisí rochtana oscailte a úsáid lena n-áirítear Open Street Maps agus QGIS.

Reáchtáladh an t-imeacht ar líne agus i láthair go pearsanta in Ollscoil na Gaillimhe (Insight/DSI) arna urrú ag an Roinn Caiteachais Phoiblí, Sheachadadh PFN agus Athchóirithe in Éirinn mar chuid dá gciste rannpháirtíochta sonraí oscailte. Rinne tionscadal IRC COALESECE/INSTAR+, Seandálaíocht na hÉireann ar Thalamh Portaigh le hImeacht Ama (IPeAAT), COC, Corcaigh urraíocht ar Ghradam Oidhreachta speisialta, agus chuir Derilinx tacaíocht maidir le Sonraí Oscailte ar fáil.

Ba iad seo a leanas buaiteoirí an imeachta:

1ú Duais, Picteilíní Cille Móna faoi stiúir Behaz Mozafari ó Choláiste na hOllscoile BÁC, a mhapáil Éire.

2ú Duais, Sráid Kastani faoi stiúir Liina Hints ó Ollscoil Tartu, a mhapáil an Eastóin.

3ú Duais, Aimsitheoirí Móna faoi stiúir Shivani Negi ó Wetlands International, a mhapáil an Eastóin freisin.

Ghnóthaigh Polagáin Polasaithe na dTailte Móna faoi stiúir Ellis Dupker, ó Wetlands International chomh maith, a mhapáil an Ísiltír, gradam oidhreachta speisialta.

Bhí eagraí na hócáide, Niall Ó Brolcháin, Ceannaire Aonaid ASPECT de chuid Insight in Ollscoil na Gaillimhe, thar a bheith sásta leis an spéis ollmhór trasna na hEorpa. Dúirt sé “gur mór an phribhléid é oibriú le pobal uile-Eorpach chun éiceachóras sonraí oscailte a fhorbairt chun tacú le fíor-éiceachóras tailte móna a athchóiriú. Ba oscailt súl domsa fiú go mbaineann an imeacht seo leis an oiread sin cuspóirí beartais éagsúla. Míle buíochas leis na daoine go léir a thug tacaíocht don imeacht seo ar go leor bealaí éagsúla”.

Bhí an-áthas orainn fáilte a chur roimh Hugo Lachater agus Théo Duch a thaistil go Gaillimh ón bhFrainc a bhuíochas do thionscadal Interreg NWE Buffer+ agus roimh Bethany Copsey, a bhí ina hionadaí do Repeat agus a thaistil thar tír ón Ísiltír.

Fuarthas cúnamh agus tacaíocht iontach ó Derilinx, mac-chuideachta a bhunaigh Insight i nGaillimh agus a bhainistíonn tairseach Sonraí Oscailte Náisiúnta na hÉireann faoi láthair. Cuid de chuspóir an imeachta seo ba ea iarracht a dhéanamh foilsiú sonraí oscailte a ghiaráil ó thacair sonraí arna gcoinneáil go poiblí. Rinne Derilinx anailís ar an tírdhreach sonraí oscailte maidir le sonraí tailte móna ar fud na hEorpa agus spreag sé gníomhaireachtaí stáit éagsúla a gcuid sonraí a fhoilsiú mar Shonraí Oscailte.

Craoladh Mapathon TV beo ar youtube ag:

https://www.youtube.com/watch?v=9KJgQLyu93c

Dúshlán ó thaobh teicniúil de a bhí i bhformáid hibrideach an imeachta ach d’éirigh go han-mhaith leis. Ní raibh sé chomh galánta céanna le Comórtas Amhránaíochta na hEoraifíse ach bhí an-chomhoibriú i gceist leis agus bhí sé ina oscailt súl iontach do go leor rannpháirtithe ó go leor tíortha éagsúla a roinn a gcuid tuairimí.