An English version of this item is available here.
Tugtar sainordú leis an Treoir maidir le Sonraí Oscailte chun sonraí ón earnáil phoiblí a scaoileadh i bhformáidí atá oscailte agus saor in aisce. Rinneadh an Treoir (an teideal iomlán: an Treoir maidir le Sonraí Oscailte, agus maidir le Faisnéis ón Earnáil Phoiblí a Athúsáid) (AE) 2019/1024 a thrasuí i ndlí na hÉireann le I.R. Uimh. 376/2021 an 22 Iúil 2021. Is é cuspóir iomlán na Treorach geilleagar sonraí an Aontais Eorpaigh a neartú i rith an ama tríd an méid sonraí ón earnáil phoiblí atá ar fáil lena n-athúsáid a mhéadú, iomaíocht chóir agus rochtain éasca ar fhaisnéis ón earnáil phoiblí a áirithiú, agus nuálaíocht trasteorann bunaithe ar shonraí a chur chun feabhais.
Is é príomhphrionsabal na Treorach gur cheart go mbeadh sonraí rialtais oscailte d’aon ghnó agus mar réamhshocrú. Tá siad seo a leanas ar fhorálacha na Treorach:
- Sonraí neamhphearsanta a scaoileadh i bhformáidí oscailte agus de réir caighdeáin oscailte.
- Sonraí a chur ar fáil i bhfíor-am agus trí APInna (más féidir).
- Rialacha nua maidir le muirearú — prionsabal is ea athúsáid saor in aisce.
- Sonraí taighde a dhéantar le maoiniú poiblí a athúsáid.
- Liosta de Thacair Shonraí Ardluacha (HVDanna) a leagan amach i nGníomh cur chun Feidhme.
- Cosc a chur le gaibhniú sonraí; socruithe eisiacha a dhíspreagadh.
- Sonraí atá i seilbh gnóthais phoiblí, ar nós fóntais phoiblí agus soláthraithe iompair, a athúsáid.
IARRATAÍ ATHÚSÁIDE
An raibh a fhios agat go raibh an ceart agat faisnéis atá i seilbh comhlachtaí poiblí a athúsáid, faoin Treoir maidir le Sonraí Oscailte?
Féadfaidh aon duine aonair nó eintiteas iarraidh a dhéanamh chuig comhlacht na hearnála poiblí chun doiciméid/sonraí a scaoileadh lena n-athúsáid.
Ba cheart go gcuirfí in iúl go soiléir san iarraidh go bhfuil sí á déanamh faoin Treoir maidir le Sonraí Oscailte, agus maidir le Faisnéis ón Earnáil Phoiblí a Athúsáid, ar a dtugtar an Treoir maidir le Sonraí Oscailte de ghnáth. Foráiltear leis na Rialacháin maidir le Sonraí Oscailte lenar trasuíodh an Treoir i ndlí na hÉireann (I.R. Uimh. 376/2021) gur cheart do chomhlacht na hearnála poiblí freagra a thabhairt ar iarraidh ar Shonraí Oscailte:
- laistigh de 20 lá oibre tar éis dó an iarraidh a fháil,
- laistigh de 40 lá oibre más iarraidh chasta atá i gceist.
Sa chás, mar gheall ar mhéid nó ar chastacht an iarratais, go nglacfaidh próiseáil níos faide ná 20 lá oibre ón tráth a bhfaightear an t-iarratas, comhairleoidh an comhlacht ábhartha de chuid na hearnála poiblí dá réir sin don té a chuireann isteach an t-iarratas laistigh de thrí seachtaine ó fuarthas an chéad iarratas. I dtosca mar sin, ba cheart don chomhlacht atá mar chuid den earnáil phoiblí an t-iarratas a fhreagairt ina iomláine laistigh de 40 lá oibre ón tráth a bhfuarthas an t-iarratas.
ACHOMHAIRC
Mura mbíonn tú sásta le cinneadh an chomhlachta phoiblí faoi d’iarraidh, is féidir leat achomharc a dhéanamh chuig Oifig an Choimisinéara Faisnéise, is comhlacht achomharc neamhspleách ag a bhfuil an chumhacht cinneadh an chomhlachta phoiblí a dhearbhú, a chur ar neamhní nó a athrú.
CEADÚNAS SONRAÍ OSCAILTE
Beidh bunús na sonraí agus na meiteashonraí atá nasctha le data.gov.ie bainteach le Ceadúnas Sannta Creative Commons (CC-BY), ar a laghad. Faoin gCeadúnas CC-BY, ní mór d’úsáideoirí foinse na Faisnéise a admháil ina dtáirge nó feidhmchlár. Sa chás nach gcuireann an Soláthraí Faisnéise ráiteas sannta sonrach, ba cheart go gcuirfeadh úsáideoirí an ráiteas sannta seo, nó nasc chuige, san áireamh: “Tá Sonraí Earnáil Phoiblí na hÉireann san áireamh arna gceadúnú faoi cheadúnas Sannta Creative Commons 4.0 Idirnáisiúnta (CC BY 4.0)”.
RIALACHÁIN
Iúil 2021 - Ionstraim Reachtúil 376/2021 — Rialacháin an Aontais Eorpaigh (Sonraí Oscailte agus Faisnéis ón Earnáil Phoiblí a Athúsáid), 2021
Meitheamh 2019 - Treoir (AE) 2019/1024 maidir le Sonraí Oscailte, agus maidir le Faisnéis ón Earnáil Phoiblí a Athúsáid (an Treoir maidir le Sonraí Oscailte)
TREOIR PSI
Bhí an Treoir maidir le Faisnéis ón Earnáil Phoiblí (PSI) a Athúsáid i bhfeidhm roimh an Treoir maidir le Sonraí Oscailte. Cuireadh an Treoir maidir le Sonraí Oscailte in ionad Threoir PSI.
TREORACHA AGUS CIORCLÁIN
Ciorclán 20/2021 — an Treoir maidir le Sonraí Oscailte
Derilinx